Старая млынарка ня любіць мяне, Што песень замнога пяю па вясьне, Што яркія стужкі ўплятаю ў касу, Што позна ў палёх абіваю расу, Што ў танцах, здаецца, зямлю абышла б, Што з розуму хлопцаў нямала зьвяла. Старая ня любіць... Што ж мне да таго! Хай сына прывяжа да лавы свайго. Хай вочы заслоніць, каб ён не глядзеў, I слухаць закажа мой сьмех і мой сьпеў. Нашто яе сын мне! А будзе ізноў Млынарка мяне дакараць, як сьвякроў, - Дальбог, раззлуюся. Усьмешкі адной Мне досыць, каб хлопец навекі быў мой, Каб маці сказаў ён: – Ня трэба журыць! Прашу, дарагая, нявестку любіць!
1958
|
|